பொட்டை அழி
முக்காட்டைத்துற
பர்தாவை தூக்கி எறிந்துவிட்டு
நிர்வாணமாய் வா
நமக்கு முக்கிய
வேலை இருக்கிறது
இன்னும் சில மனிதர்களை
உருவாக்குவோம்.
வினைத்திட்பம்
ஆவல்
நமது திருமணத்தின்போது
உன்னை நான்
என்னை நீ
பிறர் நம்மை
நாம் பிறரை
பார்த்ததைவிட -
எல்லோரும்
காமிராவை பார்த்தது அதிகம்
யாவரும் கேளீர்.....
இப்பொழுதெல்லாம்
எங்கள் ஊரில்
காதலும் இல்லை
கற்பழிப்பும் இல்லை
வருவாய்க்கு உற்ற தொழில்
விபச்சாரம் என்பதால்....
யாதும் எங்கள் ஊரே.
உழவே தொழிலானால்....
நீர் உயர வரப்புயரும்
வரப்புயர நெல் உயரும்
நெல் உயர குடி உயரும்
குடி உயர கோன் உயரும்
எல்லாம் சரி...
எங்களுர் விவசாயிக்கு மட்டும்
கூன் உயரும்.
47 கொடுமை
அசோக சக்கரம் கூட
எந்திரலாபம் கேட்கும்
இந்நாளில்...
புரியாத மொழிப்பாட்டெல்லாம்
எனக்கு
தேசிய கீதமாய் புரியும்.
சொந்த தேசியக்கொடி
இல்லாத நாட்டில்
காற்றுக்கூட
கற்பழிக்கப்பட்டதுதான்
மட...வெட்கம்.
கண்ணே!
நமது தேனிலவை
நிலவில் வைத்துக்கொள்ளலாம் என்றேன்.
அவளோ-
அன்று அமாவாசையாக இருக்கட்டும் என்றாள்
மோனாலிசம்
எழுத முப்பத்தியிரண்டு
எழுத்திருந்தும்
ஓரெழுத்தையும் பயன்படுத்தாது
நீயெழுதிய கவிதை
தற்கொலைக்கான
இன்னொரு சாதனமாகிறது.
சனவரி 25 – மொழிப் போராளிகள் நினைவேந்தல்
# பாஸ்பரசிற்கு
சரியான தமிழ்ச்சொல்-
சின்னசாமி.
தானாய் எரிந்ததால்...
# தலைவாழை இலையில்
உடலையே படையலாக்கி
தமிழிற்கு வேண்டி-
அறுசுவை உணவு படைத்தவர்களே!
நீங்கள்
பொதிகை தென்றலிற்காகவா
தீ வளர்த்தீர்கள்?
சூரியக்குளிர் போக்கவா
தீ அரங்கேற்றினீர்கள்?
# எண் சாண் உடம்பிற்கும்
தமிழே சிரசம் என்றவர்களே!
உங்களுக்கு மட்டும்
மெளன அஞ்சலி கிடையாது.
பேச - வேண்டும் தமிழ்
பேச வேண்டும்
என்றவர்கள் அல்லவா நீங்கள்.
# அந்நாளில்
காவல்துறையின் வருகைப்பதிவேடு
உங்கள் மார்புகள்.
எத்தனை அழகான கையெழுத்துகள்
குண்டு....குண்டாய்.
# தமிழிற்கு-
நெருப்பு அகழி இட்டவர்களே!
நீங்கள் காலக்கண்ணாடியை
நெருப்பில் ஏற்றி வைத்தாலும்
அதில்
தெரிவதெல்லாம் இடவல மாற்றங்களா?
இல்லை ஏமாற்றங்களா!
Subscribe to:
Posts (Atom)
